3 кыргыз студенти Финансылык коопсуздук боюнча олимпиадада байгеге ээ болушту
Кыргызстандык студенттер Красноярск шаарында өткөн Финансылык коопсуздук боюнча VI Эл аралык олимпиадада байгелүү орундарга ээ болушту. Бул тууралуу Илим министрлигинен кабарлады.
Маалым болгондой, олимпиаданын финалдык этабына 45 өлкөдөн 700гө жакын катышуучу катышты.
Жыйынтыгында 35 өлкөдөн келген 219 катышуучу жеңүүчү жана байге ээси аталды. Алардын 193ү студенттер болду.
Финалдын жыйынтыгы боюнча байге ээлери:
- Аяна Мирбекова — Жусуп Баласагын атындагы Кыргыз улуттук университетинин студенти (Эл аралык мамилелер багыты боюнча);
- Сабина Абдаримова — Кыргыз Республикасынын Эл аралык университетинин студенти (Эл аралык мамилелер багыты боюнча);
- Алиса Семенова — Исхак Раззаков атындагы Кыргыз мамлекеттик техникалык университетинин студенти (Экономика багыты боюнча).
2026-жылы студенттер үчүн финалдык тур төрт багыт (Маалыматтык коопсуздук, Эл аралык мамилелер, Экономика жана Юриспруденция) боюнча өткөрүлдү.
Финансылык коопсуздук боюнча VI Эл аралык олимпиаданын финалдык жумалыгы билим берүү, кесиптик өнүгүү, маданият жана спорт багыттарын камтыган 100дөн ашык иш-чараны өзүнө камтыды.
2026-жылдагы олимпиаданын негизги темасы жасалма интеллекттин финансылык коопсуздукка тийгизген таасири болду.
