Кыргызстан жана коңшу өлкөлөр QR-код аркылуу төлөмдөрдү өнүктүрүүнү макулдашты
Борбордук Азия өлкөлөрү менен Азербайжандын борбордук банктары чек ара аралык төлөмдөрдү өнүктүрүү боюнча кызматташууну макулдашты. Бул тууралуу Кыргызстандын Улуттук банкынан билдиришти.
Маалыматка ылайык, 22-23-октябрда Тажикстандын Душанбе шаарында төлөм системаларын өнүктүрүү боюнча IV регионалдык жолугушуу өттү. Ага Улуттук банк Башкармасынын мүчөсү Санжар Абдыгазиев жетектеген делегация катышты.
Жолугушууда тез төлөм системаларын өнүктүрүү, бирдиктүү QR-код стандарттарын киргизүү, киберкоопсуздук жана финансылык алдамчылыкка каршы күрөшүү маселелери талкууланды.
Жыйынтыгында тараптар биргелешкен протоколго кол коюп, беш өлкөнүн өкүлдөрүнөн турган жумушчу топ түзүүнү макулдашты. Ал QR-код аркылуу чек ара аралык төлөмдөрдү уюштуруу жана улуттук төлөм системаларын интеграциялоо маселелерин иштеп чыгат.
Ошондой эле тараптар киберкоркунучтар жана алдамчылык схемалары тууралуу маалымат алмашууну күчөтүү боюнча макулдашууга жетишти.
