Улуттук банктын атынан 1% менен кредит сунуштаган шылуундар пайда болду
Кыргызстанда алдамчылар Улуттук банктын атынан жасалма сертификаттарды таратып, жарандарга жылдык 1% менен кредит сунуштап жатышат. Бул тууралуу Улуттук банктын басма сөз кызматынан кабарлашты.
Маалыматка ылайык, шылуундар өздөрүн финансылык консультант катары тааныштырып, мессенджерлер аркылуу Улуттук банктын атынан даярдалган жасалма сертификаттарды жөнөтүшүүдө.
Ушундан улам, Улуттук банк жарандарга түздөн-түз кредит бербей турганын жана мессенджерлер аркылуу кредиттик консультацияларды жүргүзбөй турганын белгилеп, алдамчылардан коргонуу үчүн жарандарды төмөнкү эрежелерди сактоого чакырды:
- Мессенджер аркылуу жөнөтүлгөн сертификаттардын сүрөттөрүнө ишенбөө;
- Шектүү шилтемелерди ачпоо;
- Банк картасынын маалыматтарын жана тастыктоо коддорун эч кимге бербөө;
- Акчага байланыштуу шашылыш чечим кабыл албоо сунушталат.
