Депутаттардын айлыгын кыскартуу – бул чындап эле үнөмдөөбү же популизмби?
Бир күн мурда президент Садыр Жапаров мамлекеттик бюджеттин чыгымдарын оптималдаштыруу боюнча жарлыкка кол койду, анда башка чаралар менен катар депутаттардын айлык маянасын кыскартуу да камтылган. Бирок маалыматтарга караганда, парламентарийлердин айлыгы өтө көп деле өзгөргөн эмес.
Жарлыктын алкагында ЖКнын депутаттарына кеткен чыгымдарды азайтуу боюнча парламентарийлердин кызматтык айлыктары төмөндөтүлгөн.
Ошентип:
- ЖКнын Төрагасынын кызматтык айлыгы – 30 миң сом
- Вице-спикерлердин айлыгы – 27 миң сом
- парламенттик фракциялардын лидерлерине жана комитеттердин төрагаларынын маянасы – 26 миң сом
- депутаттардын айлыгы – 25 миң сом деп чечим чыгарылган.
Бирок 2020-жылдын июль айында Жогорку Кеңештин басма сөз кызматы депутаттардын айлыгы 200 миң сомго чейин жетет деген маалыматты төгүнгө чыгарган болчу.
«Депутаттар 25 миң сом, вице-спикер 27 миң сом, ал эми Жогорку Кеңештин төрагасы 30 миң сом алат», – деп айтылган ал маалыматта.
Белгилей кетсек, буга чейин депутаттын орточо айлыгы кошумча берилген үстөктөрдү эсепке албаганда 30 миң сом экени айтылган. Бирок үстөк акылар айлыктын суммасы менен бирдей болушу мүмкүн.
Эскерте кетсек, Дастан Бекешев өзүнүн YouTube каналында жарыялаган маегинде депутаттар 25 миңден 70 миң сомго чейин айлык алышат деп билдирген болчу.
«Айлык акынын өлчөмүнө депутаттын иш стажы, илимий наамы жана башка факторлор таасир этет. Менин маянам болсо – 50 миң сом», – деген ал.
Депутаттар ай сайын уюлдук байланышка, бензинге, унааларын оңдоого жана кеңсе буюмдарына кошумча каражат алышаарын белгилей кетиш керек. Мындан тышкары, алар кышка даярдык көрүү үчүн 35 миң сомдон консервалоо үчүн төлөмдөрдү алышат.
Депутаттардын айлык акысын төмөндөтүүдө бюджетте канчалык үнөмдөө болоору азырынча белгисиз. Бирок өткөн жылы депутаттарга 790 млн сомдон ашык каражат жумшалган.
