Каржы министрлигине аудит: бюджетке кайтарыла элек каражаттар бар
14-августта Эсептөө палатасы Каржы министрлигине караштуу кызматтар жана мекемелердеги 2025-жылдагы бюджеттин аткарылышы боюнча шайкештик аудитин аяктады.
Эсептөө палатасынын маалыматына ылайык, аудиттин жыйынтыгында жалпы суммасы 110 млн 181,6 миң сомду түзгөн каржылык мыйзам бузуулар жана кемчиликтер аныкталган.
Текшерүүнүн жана көрүлгөн чаралардын натыйжасында калыбына келтирилүүгө тийиш болгон 26 млн 797,6 миң сомдун 10 млн 115,9 миң сому казынага кайтарылган.
Эң ири мыйзам бузуу милдеттенмелерди кабыл алуу, тастыктоо жана бекитилген көрсөткүчтөрдөн ашыкча чыгымдоо багытында аныкталган. Анын көлөмү 80 млн 835,2 миң сомду түзгөн. Калыбына келтирилүүгө тийиш болгон 5 млн 110,4 миң сомдун 90,8 миң сому гана кайтарылган.
Ошондой эле бюджетке тиешелүү каражаттарды чегерүүдө 9 млн 712,1 миң сом, белгиленген ченемдерден ашыкча жана негизсиз бөлүштүрүүдө 1 млн 96,3 миң сом өлчөмүндө мыйзам бузуулар аныкталган.
Капиталдык салымдарга бюджеттик каражаттарды пайдаланууда жана курулуш иштерин аткарууда 2 млн 103,3 миң сомдук мыйзам бузуу катталып, анын 317,2 миң сому казынага кайтарылган.
Мындан тышкары, бухгалтердик эсеп жүргүзүүдө 11 млн 574,6 миң сомдук, ссудалык жана насыялык каражаттарды берүү жана пайдаланууда 2 млн 826,8 миң сомдук, мамлекеттик сатып алуулар жана башка багыттар боюнча 1 млн 548 миң сомдук бузуулар катталган.
Эсеп палатасынын маалыматына ылайык, ссудалык (белгилүү бир мөөнөткө кайтарып берүү шарты менен берилген акча же каражат) жана насыялык каражаттар боюнча аныкталган 2 млн 826,8 миң сом толугу менен кайтарылган. Ал эми бухгалтердик эсеп боюнча калыбына келтирилүүгө тийиш болгон 6 млн 965 миң сомдун 6 млн 881,1 миң сому төлөнгөн.
Аудиттин жыйынтыгы боюнча Каржы министрлигинин тиешелүү түзүмдөрүнө аныкталган мыйзам бузууларды жоюу, калган каражаттарды казынага өндүрүү жана каржылык тартипти күчөтүү боюнча милдеттүү түрдө аткарылуучу жазма буйруктар жана сунуштамалар жөнөтүлдү.
