Депутат Мурадил Сыдыковдун жубайы быйыл 26 млн сомдук тендерди утуп алган - фактчек
2022-жылы Жогорку Кеңештин депутатынын жубайына таандык MS Building курулуш компаниясы жалпы суммасы 26.4 млн сомдук курулуш тендерлерин утуп алган. Бул тууралуу Factcheck.kg сайтынын журналисттери аныкташты.
Маалыматта аз убакыт мурда бул бизнес Жогорку Кеңештин VII чакырылышынын депутаты Мурадил Сыдыковдун наамына катталганы көрсөтүлгөн. Компания азыр анын жубайына таандык.
Иликтегендер “Мамлекеттик сатып алуулар жөнүндө” мыйзамга ылайык, чиновниктердин жана депутаттардын жакындарынын тендерлерге катышуусуна, ошондой эле мамлекеттик сатып алуу процессинин өзүнө кандайдыр бир таасир этүүгө тыюу салынганын эскертет.
Компания өз ишмердүүлүгүн 2007-жылы баштаган жана «турак жай жана турак жай эмес имараттарды куруу», ошондой эле ар кандай татаалдыктагы жылуулук, суу, электр менен жабдуу сыяктуу инженердик тармактагы бир канча иш менен алектенет. Компания 2022-жылдын 19-июлунда кайра каттоодон өтүп, азыр Токтосунова Айза Кубулбековнага катталган. Анын бир тууганы Ренат Кубулбекович Урдолетов ишкананын директору. Буга чейин депутат өзү компаниянын директору жана негиздөөчүсү болуп турган жана ал 2021-жылдын 29-декабрында ант берген.
MS Building компаниясы өзү жыл сайын ири суммадагы тендерлерди утуп алат. Алсак, 2017-жылы компания жалпысынан 188 млн сомдук келишимдерге кол койгон.
Мурадил Сыдыков 2021-жылдын декабрь айында “Ынтымак” партиясынан Жогорку Кеңешке депутат болгон жана Транспорт, коммуникациялар, архитектура жана курулуш боюнча комитеттин мүчөсү болот. Ал эми 2022-жылы анын жубайынын компаниясы утуп алган тендерлердин суммасы 26 млн сомду түзгөн.
Көбүнчө компания Бишкек шаардык мэриясынын алдындагы Капиталдык курулуш башкармалыгынан, ошондой эле «Бишкексвет» жана «Бишкек жылуулук тармагы» ишканаларынан тендерлерди утуп алган.
«Мамлекеттик сатып алуулар жөнүндө» мыйзамдын 6-беренесине ылайык, аффилирленген жактарга мамлекеттик сатып алуулардын кайсы гана этабында болбосун, кандайдыр бир берүүчүнүн кызыкчылыгы үчүн чечимдерге кандайдыр бир таасир көрсөтүүсүнө тыюу салынат.
