КР менен БАЭнин ортосунда капиталы 100 млн долларга жеткен инвестициялык фонд түзүлөт

КР менен БАЭнин ортосунда Абу-Даби өнүктүрүү фонду түзүлөт. Бул тууралуу кечээ, 24-октябрда Жогорку Кеңештин Бюджет, экономикалык жана фискалдык саясат боюнча комитетинин жыйынында Экономика жана коммерция министри Данияр Амангельдиев билдирди.

Жыйында баяндама жасаган министр КР министрлер кабинети менен БАЭнин өкмөтүнүн ортосунда туруктуу өз ара аракеттенүү, КРнын социалдык-экономикалык өнүгүүсүн камсыздоо, финансылык ресурстарды мобилизациялоо үчүн эки өлкөнүн ортосунда биргелешкен холдинг компаниясын түзүү макулдашылганын жана аталган макулдашуунун долбоорун жактыруу үчүн аны комитеттин кароосуна алып келгенин билдирди.

“Холдингдин максаттары жана милдеттери – артыкчылыктуу инвестициялык долбоорлорду каржылоо менен БАЭнин, КРнын экономикасына түз инвестицияларды тартуу болуп саналат. Компаниянын иши экспортту колдоого, жаңы технологияларды тартууга, өнөр-жайды модернизациялоого, региондорду өнүктүрүүгө багытталат.

Өнүктүрүү фонддун уставдык капиталы 100 млн доллардын тегерегинде болот. Келечекте 1 млрд долларга жете турган мүмкүнчүлүгү бар. Бул Орус-кыргыз өнүктүрүү фонду иштеген принципте иштейт, болгону акча каражаты эмираттарда болот, келген долбоорлор жактырылган күндө кредит түрүндө 4-5% менен берилет”, – деди ал.

Ошондой эле Амангельдиев Финансы министри менен Улуттук банктын төрагасы БАЭге барып келишкенин, алар фонддун жетекчилиги менен жолугушуп, макулдашканын, президенттин жакынкы күндөрдөгү расмий иш сапарында бул келишимге кол коюлат деп умүттөнүп турушканын кошумчалады.

“Башкармалыкта үчөө кыргыз тараптан, экөө эмираттан, ал эми фонддун кеңешинде үчөө алардан, экөө кыргыз тараптан болот. Анткени негизги акча каражаты араб фондусунан берилет”, – деди ал.