Бийлик «Газпром Кыргызстанга» 700 млн сом карыз - компания эмнеге газ менен камсыз кылбай жатканын айтты
“Газпром Кыргызстан” ЖЧКнын башкы директордун экономика жана финансы боюнча орун басарынын милдетин аткаруучу Арзымат Алдаяров Жогорку Кеңештин бүгүнкү, 19-январдагы жыйынында компания кирешесиз эле тариф менен иштеп жатканын жана кыргыз бийлиги аларга 700 млн сом карыз экенин билдирди.
Жыйында депутат Алишер Козуев “Газпром Кыргызстан” компаниясы “Кыргызгазды” 1 долларга алгандан бери кандай иш аткарылганына кызыкты.
“Канча жылда Кыргызстанда толук кандуу газификация кылып бүтөсүздөр? 2050-жылы да бүткүдөй эмессиздер. Келишимде кандай эле, так маалымат айтыңызчы, 100% качан газ менен камсыз кыласыздар?” – деди депутат.
Алдаяров компания газификация боюнча генералдык схема иштеп чыкканын, анын мөөнөтү 2030-жылга чейин каралганын билдирди.
“Ошол схемада Кыргызстандын газ менен камсыз болуусун 60%га көтөрөбүз деп каралган. Быйылкы план менен Бишкекте беш жаңы конуш, Чүй облусунда эки калктуу конушка – 6 миң абонентке газ берилет.
Советтер Союзунда курулган 2 миң 800 чакырымга беш жылдын ичинде 1 миң 200 газ түтүктөрүн куруп бердик. Андан тышкары, газ бөлүштүрүүчү станцияларды да куруп бүттүк.
Бирок экономикалык фактор да болуп жатат, ал жагынан биздин тариф өздүк наркынан ылдый коюлган. Пайдасыз тариф менен алты жылдан бери иштеп келе жатабыз. Өкмөт тараптан чоң карыздар да бар, ал карыздар 700 млн сомго жакындап калды. Биздин 1 жылдык инвестициялык программабыз 1 млрд сом, ошонун 700 млн сому карызда турат”, – деди “Газпром Кыргызстандын” өкүлү.
Эскерте кетсек, «Кыргызгазды» Кыргызстан 2013-жылы Россияга символикалык түрдө 1 долларга сатып жиберген. Тагыраак айтканда, 10-апрелде Бишкекте «КыргызгазПром» ЖЧКсынын уставдык капиталындагы 100% үлүшүн россиялык «Газпром» ААКсына сатуу (өткөрүү) боюнча келишимге кол коюлган жана кийинчерээк ал «Газпром Кыргызстан» ЖЧК болуп өзгөргөн. Натыйжада, келишимге ылайык, «Газпром» Кыргызстанды газ менен камсыздоо, газ түтүктөрүн оңдоо сыяктуу бир катар милдеттенмелерди мойнуна алган.
