Салыкчылар күйүүчү майды мыйзамсыз сатуу схемасын калкалаган – УКМК
Кыргызстанда күйүүчү-майлоочу материалдарды мыйзамсыз ташып келип саткандарды калкалаганы үчүн салык кызматкерлери кармалды. Бул туурасында УКМК билдирди.
Такталгандай, салык кызматынын ЕАЭБдеги сооданын алкагында эсепке алынбаган товарлар менен иштөө башкармалыгынын башчысы Б.Р.К., ошондой эле Ош шаары, Ош жана Жалал-Абад облустары боюнча эсепке алынбаган товарлар жана товарларга байкоо жүргүзүү бөлүмүнүн жетекчиси Н.Д.О. узак убакыт бою кызмат абалынан кыянаттык менен пайдаланган.
«Чет өлкөдөн алып келинген күйүүчү май түндүк регионунан түштүктөгү облустарга алып өтүү шылтоосу менен салык органдарында эсепке алынган эмес. Ал фирмалардын күйүүчү май ташыган унааларын Салык кызматынын «Сосновка» жана «Кара-Көл» көзөмөл-өткөрүү пунктуларынан тоскоолдуксуз өткөрүшкөн. Бул коррупциялык схемага колдоо көрсөткөндүгү үчүн салыкчылар майдын ар бир литри үчүн 1 сомдон алып турганы аныкталган", — деп айтылат маалыматта.
Ошондой эле Салык кызматынын Панфилов районундагы башкармалыгынын өзгөчө режим бөлүмүнүн башчысы А.Т.М. жана Жайыл районундагы башкармалыгынын салыктык текшерүү бөлүмүнүн улук инспектору М. у. Б. жасалма электрондук товар-транспорттук кагаздарына штамп чаптап, түштүк аймактарга күйүүчү-майлоочу майды жөнөтүү жана сатуу үчүн атайын пломбаларды тапшырышкан. Бул кызматына ар бир документ үчүн 5 миң сомдон алганы ырасталган.
