Кыргызстандын суу маселесин чечүү үчүн $1.2 млрд керек – Акылбек Жапаров
Суу маселелерди чечүү үчүн Кыргызстанга $1 млрд 200 млн керек. Бул тууралуу министрлер кабинетинин төрагасы Акылбек Жапаров 31-майда Бишкек суу форумунун жүрүшүндө билдирди.
Анын айтымында, бүгүнкү күндө таза жана сугат суунун коопсуздугу маселеси эң курч коюлууда.
«Министрлер кабинети Дүйнөлүк банк менен биргеликте биздин ирригациялык тармактарды модернизациялоо үчүн жакынкы аралыкта $800 млн, ал эми жалпы калкты ичүүчү суу менен камсыздоо үчүн $400 млн керектелерин эсептеп чыкты», - деди Жапаров.
Ал бул маселенин маанилүүлүгүнө токтолуп, глобалдык климаттын өзгөрүшүн жана бүгүнкү күндө суу адамдын эң негизги муктаждыгы экенин белгиледи.
