Катардын эмири мамлекеттик сапар менен Кыргызстанга келет
Катар мамлекетинин эмири Шейх Тамим бин Хамад Аль Тани 2023-жылдын 6-7-июнунда мамлекеттик сапар менен Кыргызстанга келет. Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.
Анын айтымында, бул араб мамлекетинин башчысынын Кыргызстанга биринчи жолу келиши.
«Сапардын алкагында КРнын президенти Садыр Жапаров Катар мамлекетинин эмири шейх Тамим бин Хамад Аль Тани менен эки тараптуу сүйлөшүүлөрдү өткөрөт. Өлкө лидерлери эки тараптуу жана көп тараптуу кызматташтыктын учурдагы маселелерин, ошондой эле аны мындан ары өнүктүрүүнүн жана натыйжалуу өз ара аракеттенүүнүн келечегин талкуулашат», - деп билдирди Муратбек Азымбакиев.
Ошондой эле, сапардын жүрүшүндө бир катар эки тараптуу документтерге кол коюу пландаштырылууда.
