Кыргызстандын түштүк аймагына да Асмандай шаар курулат. Бул тууралуу Асман шаарынын бет ачарында президент Садыр Жапаров билдирди.

Анын айтымында, кайсы жерге салынбасын, бул шаар ар бир кыргызстандык үчүн пайда бере турган, өлкөбүздүн жалпы экономикасын алдыга жылдыра турган Кыргызстандын локомотив шаары болот.

«Сөздү маалы келгенде айтпасаң, сөз атасы өлөт дейт. Айрым биздин кыска ой жүгүрткөн жарандарыбыз “бул шаарды Баткенге салып койбойт белеңер, баарын эле Көлгө сала бересиңерби” деген дооматтарын айтып жатышат.

Эгер Ысык-Көл Баткен тарапта болгондо, биринчи кезекте бул шаарды Баткенге салдырат элем», - деди Жапаров.