Саламаттыкты сактоо системасын өнүктүрүү өлкөбүз үчүн артыкчылыктуу багыттардын бири болуп саналат жана минкаб аны стратегиялык жактан өнүктүрүүгө өзгөчө маани берет. Бул тууралуу Бишкекте ШКУга мүчө өлкөлөрдүн эл аралык медициналык конгрессинде министрлер кабинетинин төрагасы Акылбек Жапаров билдирди.

Минкаб башчысы өлкөнүн саламаттыкты сактоо тармагында жүргүзүлүп жаткан реформаларга токтолду. Акыркы үч жылда саламаттыкты сактоо тармагын каржылоонун көлөмү эки эсеге көбөйүп, 2019-жылы 19 млрд сом, 2023-жылы 38 млрд сом бөлүнгөн.

Медициналык мекемелердин материалдык-техникалык базасын жаңылоо боюнча масштабдуу иштер жүргүзүлүүдө. Акыркы 2 жылда кургак учукка каршы оорукана, перинаталдык борбор, кыргыз-түрк достугу ооруканасы жана башка заманбап ооруканалар курулуп, пайдаланууга берилди.

«Бардык 7 аймактык оорукана жаңы МРТ аппараттары менен камсыздалып, аймактарда 4 компьютердик томография борбору ачылды. 2 жылдын ичинде 335 жаңы тез жардам унаасы сатылып алынган. Тилекке каршы, бөйрөк оорусунан жабыркаган жарандардын саны жыл сайын көбөйүүдө. Гемодиализ менен ооругандарга жардам көрсөтүү үчүн мамлекеттик бюджеттен 2.2 млрд сомдон ашык каражат каралган.

Өлкө президентинин демилгеси менен өткөн жылы Кыргызстанда бөйрөк алмаштыруу операциялары башталып, атайын жабдыктарды алууга президенттик фонддон 1 млн доллар бөлүнгөн. Ал эми быйыл түрк кесиптештеринин колдоосу менен боорду алмаштыруу боюнча операцияларды баштоону пландап жатабыз. Ушул убакка чейин биздин жарандар эбегейсиз чыгымга учурап, чет өлкөдө ушундай операцияларды жасоого аргасыз болушкан», - деди ал.

Учурда мамлекеттик инвестициялык программанын алкагында жалпы суммасы 77 млн долларын түзгөн 4 ири долбоор ишке ашырылууда. Ошондой эле 116.5 млн доллардан ашык гранттык долбоорлор ишке ашырылууда.