Өкмөттө нефть азыктарынын резерви талкууланды
Министрлер Кабинетинин төрагасы Адылбек Касымалиев өлкөнүн ички рыногун нефть жана күйүүчү-майлоочу материалдар менен камсыздоо маселелери боюнча кеңешме өткөрдү. Бул тууралуу Өкмөттүн басма сөз кызматынан билдиришти.
Жыйындын жүрүшүндө нефть азыктарын жеткирүү, логистика, резервдердин көлөмү жана күйүүчү майга болгон баалар боюнча маселелер талкууланды. Өзгөчө, рынокто тартыштыктын алдын алуу жана баанын негизсиз өсүшүнө жол бербөө боюнча маселелерге көңүл бурулду.
Өкмөт мүчөлөрү учурдагы абал тууралуу маалымат берип, процесстерди жакшыртуу боюнча сунуштарын ортого салды. Ошондой эле, өлкөдөн нефть жана нефть продуктыларын сыртка чыгарууга убактылуу тыюу салуу чечими күчүндө экени эске салынды.
Кеңешменин жыйынтыгында Адылбек Касымалиев тиешелүү мамлекеттик органдарга бир катар тапшырмаларды берди. Атап айтканда:
күйүүчү-майлоочу материалдардын баасына көзөмөлдү күчөтүү;
жетиштүү көлөмдө май резервин түзүү;
рыноктогу кырдаалга ыкчам реакция кылуу;
жарандар менен ишканаларды туруктуу жана үзгүлтүксүз камсыздоону камсыздоо.
