И.Арабаев атындагы КМУнун 80 жылдыгы белгиленди
Бүгүн Ишеналы Арабаев атындагы Кыргыз мамлекеттик университетинин 80 жылдыгына арналган салтанаттуу иш-чара болуп өттү. Ага Министрлер Кабинетинин башчысы Адылбек Касымалиев катышып, университеттин жамаатын, студенттерин жана бүтүрүүчүлөрүн юбилейи менен куттуктады.
«Университеттин тарыхы кыргыз мамлекеттүүлүгүнүн жана агартуусунун көрүнүктүү ишмерлеринин ысымдары менен тыгыз байланыштуу. Ишеналы Арабаев, Төрөбай Кулатов, Муса Рыскулбеков жана Акима Оторбаева Кыргызстанда педагогикалык билим берүүнүн башатында турушкан», — деп белгиледи Адылбек Касымалиев.
Билдирүулөргө караганда, университет 80 жыл ичинде 50 миңге жакын адисти даярдап чыгарган жана өлкөнүн бардык мектеп мугалимдеринин 40%га жакыны ушул университеттин бүтүрүүчүлөрү болуп саналат. Учурда университетте 22 миңден ашык студент билим алат, ал эми профессордук-окутуучулук курам миңден ашык адамды түзөт, анын ичинде 85 илимдин доктору жана 300 илимдин кандидаты бар.
