МинКаб: Кыргызстанда туризмден түшкөн киреше 30 млрд сомдон ашты
Министрлер Кабинетинин төрагасы Адылбек Касымалиев туризмди өнүктүрүү боюнча Улуттук кеңештин жыйынын өткөрдү. Иш-чарага мамлекеттик органдардын жана туризм тармагындагы бизнес өкүлдөрү катышты. Бул тууралуу өкмөттүн басма сөз кызматынан билдиришти.
Адылбек Касымалиевдин айтымында, 2025-жылдын биринчи жарым жылдыгында туризмдин дүң кошумча наркы 30,18 млрд сомду, ИДПдагы үлүшү 4,3%ды түздү. Туризм кызматтарынын экспорту 529,5 млн долларга, импорту 283,9 млн долларга жеткен. Салыктык түшүүлөр болсо 8,486 млрд сомду түзгөн.
Өкмөт башчы инфраструктуралык ири долбоорлор башталганын белгилеп, анын ичинде “Ала-Тоо Резорт” тоо-лыжа курорунун курулушу жана аэропортторду модернизациялоо иштерин атады. Ошондой эле автосаякатчылар үчүн рест-пойнтторду уюштуруу зарылчылыгын белгиледи.
Жыйындын жүрүшүндө тармактын тогуз айлык жыйынтыгы каралып, кышкы жана үй-бүлөлүк туризмди өнүктүрүү, чакан бизнести жана инвестицияларды колдоо, жаратылышты коргоо, экологиялык маданиятты жогорулатуу боюнча тапшырмалар берилди.
