Блокчейнди өнүктүрүү кеңешинин отуруму өтүп жатат
Кыргыз Республикасынын Президентине караштуу виртуалдык активдер жана блокчейн-технологиялар чөйрөсүн өнүктүрүү боюнча улуттук кеңештин отуруму болуп жатат. Талкууга КР Президенти Садыр Жапаров баштаган өлкө жетекчилиги жана Binance компаниясынын өкүлдөрү катышууда.
Анын жүрүшүндө С.Жапаров - Кыргызстан региондогу виртуалдык активдер жөнүндө мыйзамды кабыл алган жана бул жаатта ырааттуу мамлекеттик саясатты иштеп чыккан бир нече өлкөлөрдүн бири болуп саналаарын баса белгиледи.
Өлкөдө виртуалдык активдер рыногу активдүү өнүгүп жатат. Лицензияланган катышуучулардын саны өсүүдө, ченемдик укуктук база бекемделүүдө жана инфраструктуралык демилгелер пайда болууда. Кыргызстан криптовалютаны кабыл алуунун глобалдык индексинде 19-орунда турат жана Борбордук Азияда алдыңкы орунду ээлейт. Бул санариптик чечимдерди коомдун жогорку деңгээлде кабыл алуусун чагылдырат. Анткени менен бул бизге олуттуу жоопкерчиликти жүктөйт.
Президенттин айтымында, Санариптик жана финансылык сабаттуулукту жогорулатуу жана адистерди даярдоо негизги артыкчылык болушу керек. “Биз сабаттуулукка инвестиция салып, бул жаңы чөйрөдө иштей ала турган жумушчу күчтү өнүктүрүшүбүз керек” – деп билдирди, мамлекет башчы.
