Илим, технология жана экономикага жаңы мүмкүнчүлүк ачкан протокол ратификацияланды
Президент Садыр Жапаров «Кыргыз Республикасы менен Атом энергиясы боюнча эл аралык агенттиктин ортосундагы Ядролук куралды жайылтпоо жөнүндө келишимге байланыштуу кепилдиктерди колдонуу тууралуу макулдашууга карата жаңыланган Протоколду ратификациялоо жөнүндө» Мыйзамга кол койду.
Мыйзам 2025-жылдын 17-сентябрында Жогорку Кеңеш тарабынан кабыл алынган. Анын максаты — Кыргыз Республикасы менен Атом энергиясы боюнча эл аралык агенттик ортосундагы келишимге байланыштуу жаңыланган Протоколду күчүнө киргизүү, радиациялык коопсуздук жаатындагы мыйзамдарды эл аралык стандарттарга ылайык келтирүү жана техникалык кызматташуу программаларын толук колдонуу.
Жаңыланган Протокол массалык жок кылуучу куралдар жана башка кооптуу материалдарды мыйзамсыз жеткирүүнүн жана жайылтуунун алдын алуу, ошондой эле химиялык, радиоактивдүү жана биологиялык сезгич материалдарды чакан санда жеткирүүлөрүн көзөмөлдөө механизмдерин жакшыртууга багытталган.
Протоколдун ратификациясы өлкөгө илимде, технологияда, экономикада жана эл аралык кызматташтыкта жаңы мүмкүнчүлүктөрдү ачат.
