Жалал-Абадда 945 батирлүү “Асман Резиденс-4” турак жай комплекси ачылды
Президент Садыр Жапаров бүгүн, 28-октябрда, Жалал-Абад облусуна болгон иш сапарынын алкагында “Мамлекеттик ипотекалык компания” тарабынан курулган “Асман Резиденс-4” турак жай комплексинин ачылышына катышты. Бул тууралуу Президенттин маалымат кызматынан билдиришти.
Тогуз кабаттуу 12 блоктон турган комплекс Сузак районунун Ленин айылында жайгашкан. Анда 945 батир, 172 орундуу жер астындагы, 514 орундуу жер үстүндөгү автоунаа токтотуучу жай, балдар аянтчасы жана воркаут-зона каралган.
Мамлекет башчысы өз сөзүндө жарандарды жеткиликтүү жана ыңгайлуу турак жай менен камсыз кылуу боюнча мамлекеттик саясат ырааттуу ишке ашып жатканын белгиледи.
Президент белгилегендей, быйылкы жылдын 9 айында 3 621 жаран батирге ээ болгон, ал эми 13 миңден ашык үй-бүлө турак жай алган, дагы 69 миңден ашык жаран кезекте турат.
“Мамлекеттик ипотекалык компаниянын” уставдык капиталы 2015-жылы 10 млн сомдон быйыл 87,5 млрд сомго чейин өстү. Компания санариптик платформалар аркылуу арыз кабыл алуу процессин автоматташтырып, коррупциялык тобокелдиктерди азайтууда.
Иш-чаранын соңунда Президент Садыр Жапаров Манас шаарындагы №1 мектептин мугалими Сейдеке Эргешовага жаңы батирдин ачкычын тапшырды жана комплекстин жашоочуларын жаңы конуштары менен куттуктады.
