Кыргызстан 34 мамлекетте 100 шайлоо участогун ачат
Министрлер Кабинетинин Төрагасынын биринчи орун басары Данияр Амангелдиев Жогорку Кеңештин депутаттарын мөөнөтүнөн мурда шайлоону даярдоо жана өткөрүү боюнча республикалык штабдын жыйынын өткөрдү. Бул тууралуу Өкмөттүн басма сөз кызматынан билдиришти.
Жыйында Шайлоо жана референдум өткөрүү боюнча борбордук комиссиянын төрагасы Тынчтык Шайназаров жана Тышкы иштер министри Жээнбек Кулубаев даярдык иштеринин жүрүшү тууралуу маалымат беришти.
Белгиленгендей, чет өлкөлөрдө жашаган кыргызстандыктар үчүн 34 мамлекетте 100 шайлоо участогу ачылат. Мамлекеттик органдар адистерди окутуп, техникалык жабдууларды текшерүү жана эл аралык байкоочуларды чакыруу иштерин жүргүзүп жатышат.
Данияр Амангелдиев өз сөзүндө мөөнөтүнөн мурда парламенттик шайлоону ачык, мыйзамдуу жана коопсуз өткөрүүнүн маанилүүлүгүн белгиледи:
«Алдыдагы шайлоо өлкөбүздүн демократиялык өнүгүүсүндөгү маанилүү этап. Чет өлкөлөрдөгү мекендештерибиз да добуш берүүгө толук укуктуу. Биздин милдет — алардын шайлоого катышуусун камсыз кылуу жана ар бир жарандын добушу так эсептелишин камсыздоо», — деди ал.
Жыйындын жыйынтыгында тиешелүү мамлекеттик органдарга бир катар тапшырмалар берилди.
