Кыргызстан жана Мисирдин мамлекет башчыларынын эки тараптуу сүйлөшүүлөрү болду
КРнын Президенти Садыр Жапаров бүгүн Мисир Араб Республикасына болгон расмий сапарынын алкагында Египеттин Президенти Абдель Фаттах Ас-Сиси менен тет-а-тет форматында жолугушту. Анын жүрушундө тараптар өз ара кызыкчылык туудурган эки тараптуу кызматташтык маселелерин талкуулашты.
Мамлекет башчылары бул сапар кыргыз-мисир мамилелерине жаңы дем берип, кызматташтыкты сапаттык жаңы деңгээлге чыгарарына ишеним билдиришти жана белгиленген тармактарда биргелешкен долбоорлорду активдүү илгерилетүү үчүн бардык аракетин жумшоого даяр экендиктерин билдиришти.
Андан соң лидерлер кеңейтилген форматта сүйлөшүүлөрдү жүргүзүштү. Анда тараптар кыргыз-мисир кызматташтыгынын негизги багыттары, анын ичинде саясий диалогду өнүктүрүү, экономикалык өз ара аракеттенүү, инвестициялар жана эки жактуу кызыкчылыкты туудурган башка маселелерди талкуулашты.
Президент Садыр Жапаров Мисирдин Жакынкы Чыгыш аймагындагы жана Африка континентиндеги конструктивдүү ролун жогору баалап, эки өлкөнүн ортосундагы достукту бекемдөө жана байланыштарды өнүктүрүү максатында Каир шаарында КРнын Элчилигин ачуу чечими кабыл алынганын билдирди.
Жолугушуунун соңунда тараптар Кыргызстан менен Мисирдин ортосунда өз ара пайдалуу өнөктөштүктү өнүктүрүү үчүн зор мүмкүнчүлүктөр бар экенин ырасташты.
