Кыргызстан "Бирдиктүү ден соолук" ыкмасы менен пандемияга даярдыгын күчөтүүдө
Кыргызстанда жугуштуу оорулардын алдын алуу жана эпидемиологиялык көзөмөл системасын чыңдоо боюнча иштер уланууда. Бул тууралуу Саламаттык сактоо министрлиги маалымдады.
Билдирүүгө ылайык, 2026-жылы АКШ өкмөтү каржылаган EpiC долбоорунун колдоосу менен өлкөнүн 49 районунан 275 адис I-EPID электрондук эпидемиологиялык көзөмөл системасын колдонуу боюнча окуудан өттү.
Мындан тышкары, кара тумоо, күйдүргү, бруцеллёз жана кутурма оорулары боюнча окуу программалары иштелип чыгып, медициналык жана ветеринардык адистер окутулду. Ошондой эле медициналык калдыктарды коопсуз зыянсыздандыруу үчүн саламаттык сактоо мекемелерине жана лабораторияларга 11 автоклав орнотулду.
Бул багыттагы иштер Бишкекте өткөн "Бирдиктүү ден соолук" ыкмасына арналган тегерек столдо талкууланды. Иш-чарага мамлекеттик органдардын, АКШ элчилигинин жана эл аралык уюмдардын өкүлдөрү катышты.
Жолугушууда эпидемиологиялык көзөмөлдү жакшыртуу, лабораториялардын мүмкүнчүлүктөрүн кеңейтүү жана жугуштуу оорулардын, анын ичинде жаныбарлардан адамдарга жугуучу оорулардын алдын алуу маселелери каралды.
