Адылбек Касымалиев: Быйыл өлкө ИДПсы 10%га өсүп, 1,24 трлн сомго жетти

Күн мурун Министрлер Кабинетинин төрагасы Адылбек Касымалиев «Gulf News» эл аралык басылмасына интервью берип, өлкөнүн экономикалык жетишкендиктери жана өнүгүү багыттары тууралуу маалымат берди.

МинКаб башчысы акыркы жылдары туруктуу экономикалык өсүш байкалганын белгилеп, акыркы үч жылда орточо өсүү 9,0%, ал эми 2025-жылдын 9 айындагы ИДПнын өсүшү 10,0% болуп, көлөмү 1 трлн 240,5 млрд сомго жеткенин билдирди.

Анын айтымында, өсүштүн негизги кыймылдаткыч күчү — курулуш, өнөр жай жана тейлөө секторлору, аларды ички суроо-талап, инвестициялар жана ири инфраструктуралык долбоорлор колдоодо.

Касымалиев ошондой эле Кыргызстан инвестициялык климатты жакшыртып, экономикалык институттарды бекемдөө багытында иш алып барып жатканын белгиледи. Өзгөчө көңүл Бириккен Араб Эмираттары менен кызматташууга, анын ичинде «Өкмөттүк акселераторлор» биргелешкен программасына бурулду.

Интервьюнун соңунда ал эл аралык инвесторлорду Кыргызстанды инвестиция үчүн ишенимдүү жана ачык өнөктөш катары кароого чакырды.