IV Элдик Курултайга даярдык көрүү боюнча жыйын өттү
Мамлекеттик катчы Марат Иманкуловдун төрагалыгы алдында Элдик Курултайга даярдык көрүү, делегаттарды шайлоо жана координациялоо боюнча уюштуруу комитетинин кезектеги жыйыны болуп өттү. Бул тууралуу Президенттик администрациянын маалымат кызматынан кабарлашты.
Жыйында IV Элдик Курултайга даярдык көрүүчү негизги маселелер жана аны жогорку деңгээлде өткөрүүгө багытталган чаралар талкууланды. Мамлекеттик катчы Марат Иманкулов Курултай коом менен мамлекеттик институттардын ортосундагы ачык диалог жана ишенимди бекемдөөчү натыйжалуу аянтча болушу керектигин белгиледи.
Президенттин Администрациясынын маалыматына ылайык, делегаттарды шайлоо республика боюнча 231 айылдык аймак жана 33 шаарда өтүп, 700 делегат IV Элдик Курултайга катышууга укук алды. Бул курам өлкөнүн бардык аймактарынан келген жарандардын пикирлерин жана кызыкчылыктарын чагылдырган.
Жыйындын жүрүшүндө логистика, делегаттарды жайгаштыруу, коопсуздук жана мамлекеттик органдар менен жергиликтүү администрациялардын ишин координациялоо маселелери да каралды.
Уюштуруу комитети мамлекеттик органдарга жана жергиликтүү өз алдынча башкаруу органдарына Курултайды жогорку деңгээлде өткөрүү боюнча конкреттүү тапшырмаларды берди.
