Кыргыз-мисир бизнес-форуму өттү
КРнын Президентинин Мисирге болгон расмий сапарынын алкагында Мисирдин ишкер чөйрөлөрүнүн өкүлдөрүнүн катышуусунда Каир шаарында биринчи жолу кыргыз-мисир бизнес-форуму болуп өттү.
Премьер-министр Мустафа Мадбули кыргыз делегациясын тосуп алып, Президент Садыр Жапаровдун сапары эки өлкөнүн ортосундагы достук мамилелерди бекемдөөдө маанилүү баскыч болоруна ишеним билдирип, жетишилген макулдашуулар жана кол коюлган келишимдер эки өлкөнүн мамилесин жаңы сапаттык деңгээлге чыгарарын баса белгиледи.
Өз кезегинде Президент Садыр Жапаров Кыргызстан Мисир менен ар тараптуу алакаларды өнүктүрүүгө кызыкдар экенин ырастап, Кыргызстандын санариптик финансылык инструменттерди киргизүү жана виртуалдык активдер рыногун өнүктүрүү боюнча чаралары тууралуу айтып берди.
Жолугушуунун жүрүшүндө транспорттук-логистикалык байланыштарды өнүктүрүүгө өзгөчө көңүл бурулуп, Садыр Жапаров “Кытай–Кыргызстан–Өзбекстан” темир жолунун курулушунун башталышын белгилеп, ал эл аралык каттамдар менен байланышып, Азия, Европа жана Африканын ортосунда жаңы альтернативдүү соода жолдорун түзөрүн айтты.
Мындан тышкары, форумда эки өлкөнүн экономикасынын негизги багыттарын жана туристтик мүмкүнчүлүктөрүн, энергетика, өнөр жай, айыл чарба, транспорт жана санарип экономикасы тармактарындагы келечектүү долбоорлорду көрсөткөн видео презентациялар тартууланды.
