Садыр Жапаров C5+1 саммитинде инвестиция, гидроэнергетика жана IT жөнүндө сүйлөдү
Президент Садыр Жапаров кечээ, 6-ноябрда, Вашингтондо Борбордук Азия – АКШ (C5+1) саммитинин башталышы алдында басма сөз жыйынында сүйлөп, Кыргызстанды Америка Кошмо Штаттарынын маанилүү тышкы саясий өнөктөшү катары жогору баалаарын билдирди. Бул тууралуу Президенттик администрациянын маалымат кызматынан билдиришти.
Мамлекет башчысы кыргыз-америка мамилелеринин 4 приоритеттүү багытын белгиледи: экономика жана инвестициялар, туризм; гидроэнергетика; санарип экономика жана IT; коопсуздукту жана туруктуулукту камсыздоо. Садыр Жапаров Дональд Трамптын глобалдык туруктуулукту бекемдөөгө жана жаңжалдарды токтотууга кошкон салымын жогору баалады.
Президент өз сөзүндө чек ара маселелерин тынчтык жолу менен чечүү жана аймактагы кызматташтыкты күчөтүү боюнча жетишкендиктерине да токтолду. Ал белгилегендей, C5+1 форматы Борбордук Азия өлкөлөрү менен АКШнын саясий диалогун өнүктүрүүгө жана экономикалык кызматташтыкты кеңейтүүгө маанилүү аянтча болуп саналат.
Дональд Трамп өз кезегинде чөлкөмдүн маанилүүлүгүн баса белгилеп, экономикалык коопсуздукту чыңдоо жана жеткирүү чынжырын кеңейтүү Борбордук Азия менен АКШнын кызматташтыгынын негизги багыттарынын бири экенин билдирди.
