С.Жапаров: "Мамлекеттин жардамы менен 55 студент дүйнөнүн 38 алдыңкы ЖОЖдорунда окуп жатат"
Бүгүн президент Садыр Жапаров “Кыялымдагы Кыргызстан” улуттук жаштар форумуна катышып, мамлекет билим берүү системасын заман талабына ылайык кылуу үчүн бардык аракетти көрүп жатканын билдирди.
“Биз “Эл үмүтү” долбоорунун алкагында 2022-жылдан тарта магистранттарга дүйнөнүн алдыңкы университеттеринде билим алууга көмөк көрсөтүп келе жатканыбызды жакшы билесиңер. Бүгүнкү күндө Президенттик фонддон 55 студент Оксфорд, Гарвард, Кембридж сыяктуу дүйнөнүн эң мыкты ЖОЖдору кирген дүйнөнүн 100 окуу жайынын 38инде билим алышып, тиешелүү академиялык даражаларды алып жатышат. Мамлекет бул үчүн 265 миллионго жакын сом бөлгөн”,-дейт ал.
Буга улай Президент учурда долбоордун 7 бүтүрүүчүсү өлкө ичинде – илимде, билим берүү жана мамлекеттик кызматта, 12си эл аралык компанияларда иштеп жатышканын баса белгиледи.
“Мындан сырткары биздин Москвадагы Щепкин атындагы жогорку театралдык окуу жайына 2021-жылы жиберилген 22 студентибиз окуусун аяктап Мекенине кайтышты. Алар Ош улуттук драма театрына кабыл алынып, ар бирине жаңы салынган үйдөн батир берилди”,-дейт өлкө башчы.
