Өлкө башчы "Манас Ордону" реконструкциялоо үчүн мезгил кутусун салды
Бүгүн, 13-ноябрда, Президент Садыр Жапаров Талас облусуна болгон иш сапарынын алкагында “Манас Ордо” Кыргыз улуттук комплексин реконструкциялоого мезгил кутусун салуу аземине катышты. Бул тууралуу Президенттик администрациясынын маалымат кызматынан кабарлашты.
Иш-чаранын башталышында меймандарга “Манас” эпосуна арналган театралдаштырылган пролог жана “Манас Ордо” комплексин реконструкциялоо долбоору тууралуу видеоролик көрсөтүлдү.
Эскизге ылайык, бардык имараттар жаңыланып, комплекс күнүнө 10 миңге чейин конок кабыл ала турган Борбордук Азиядагы уникалдуу маданий борборго айланат. Мамлекет башчысы комплексти кыргыз элинин тарыхын, салт-санаасын жана көчмөн турмушун сактоого арналган ыйык жай катары баалады.
Садыр Жапаров белгилегендей, “Манас Ордо” комплекси маданий баалуулуктарды түбөлүк жандандыруу жана улуттун руханий борборун түптөө багытындагы маанилүү аракет болуп эсептелет. Ал ошондой эле Чыңгыз Айтматовдун сөздөрүн эске салды: “Өткөндү эстеп, келечекти күтө билгенибиз үчүн биз барбыз”.
Архивдик маалыматка ылайык, “Манас Ордо” комплекси 1976-жылы адабий-этнографиялык музей, 1990-жылы “Манас күмбөзү” музей-коругу катары түптөлгөн. 1000 жылдык мааракесинде комплекс “Манас Ордо” деп өзгөртүлгөн, бирок акыркы 30 жыл ичинде эч кандай ири жаңылануу болгон эмес.
Реконструкциядан кийин комплексте заманбап конгресс-холл, көркөм өнөр жана кол өнөрчүлүк галереялары, конок үйлөр жана административдик имараттар курулат. Президент Садыр Жапаров бул жаңылануунун туризмди өнүктүрүп, кыргыз маданиятын жана “Манас” дүйнөсүн эл аралык деңгээлде таануунун жолун ачарын баса белгиледи.
Иш-чаранын соңунда Мамлекет башчысы Манастын күмбөзүнө барып, куран окутту.
