Садыр Жапаров “Баластан” балдар борборунун курулушуна старт берди
Президент Садыр Жапаров бүгүн, 13-ноябрда, Талас облусуна болгон иш сапарынын алкагында Талас шаарындагы “Баластан” балдардын оюн-зоок борборунун курулушуна мезгил кутусун салды. Бул тууралуу Президенттик администрациянын маалымат кызматынан билдиришти.
6,5 гектар аянтка курула турган борбор 2026-жылы пайдаланууга берилет. Ал аттракциондорду, мүмкүнчүлүгү чектелген балдар үчүн оюн зоналарын, заманбап кинотеатрды, конгресс-залды жана коомдук тамактануу жайларын камтыйт. Объекттин курулушу 200дөн ашуун жаңы жумуш ордун түзөт.
Президент өз сөзүндө мамлекеттин негизги максаты — ар бир балага татыктуу балалык тартуулоо экенин белгилеп, борбор жөн гана оюн-зоок жайы эмес, тарбиянын жана өнүгүүнүн борбору болорун айтты.
Садыр Жапаров өлкө аймактарында инфраструктураны тең өнүктүрүү маанилүү экенин белгилеп, Таласта ишке ашып жаткан ири долбоорлорду — “Манас-Ордо” комплексин реконструкциялоо, борбордук паркты жаңылоо жана 5500 орундуу стадион куруу иштерин мисал келтирди.
Мамлекет башчысы тиешелүү органдарды жана курулуш компанияларын сапаттуу, коопсуз жана балдардын кызыгуусуна жооп берген деңгээлде курулуш жүргүзүүгө чакырды.
Иш сапардын соңунда Президент жергиликтүү тургундар менен баарлашып, социалдык жана экономикалык маселелер боюнча пикир алмашты.
