“Эң мыкты айыл өкмөтү” сынагында 1-орун ээлери 3 млн сомдон алышты

Бүгүн Президенттик Администрацияда "Эң мыкты айыл өкмөтү" наамына жалпы мамлекеттик сынактын жеңүүчүлөрүн сыйлоо аземи болуп өттү. Иш-чарага МинКаб Төрагасы Адылбек Касымалиев катышып, жеңүүчүлөрдү куттуктады.

Адылбек Касымалиев айыл өкмөттөрүнүн демилгелерин өнүктүрүү жана айылдарды заманбап шарттарга чыгаруу маанилүү экенин белгилеп, шаарлар менен айылдар ортосундагы ажырымды кыскартууга чакырды. Ал ошондой эле билим берүү, медициналык кызмат көрсөтүүлөр, маданий жана эс алуу борборлорун өнүктүрүү, жолдорду асфальттоо жана ипотекалык турак жайларды куруу аркылуу тургундардын жашоо сапатын жакшыртууга басым жасады.

Сынак эки категорияда өткөрүлдү: бийик тоолуу жана чек арага жакын райондордогу айыл өкмөттөрү, ошондой эле жалпы айыл өкмөттөрү. Жеңүүчүлөр төмөнкүдөй аныкталды:

Бийик тоолуу жана чек арага жакын райондордогу айыл өкмөттөрү:

I орун — Баткен облусу, Баткен району, Суу-Башы айыл аймагы, 3 млн сом;
II орун — Ош облусу, Чоң-Алай району, Кашка-Суу айыл аймагы, 2 млн сом;
III орун — Жалал-Абад облусу, Чаткал району, Каныш-Кыя айыл аймагы, 1 млн сом.

Жалпы айыл өкмөттөрү:

I орун — Ысык-Көл облусу, Түп району, Ысык-Көл айыл аймагы, 3 млн сом;
II орун — Чүй облусу, Аламүдүн району, Достук айыл аймагы, 2 млн сом;
III орун — Жалал-Абад облусу, Базар-Коргон району, Сайдыкум айыл аймагы, 1 млн сом.

Конкурстун баалоо критерийлери социалдык-экономикалык көрсөткүчтөрдү камтыган. Аларга калкты таза суу менен камсыз кылуу, коомдук тартипти сактоо, жашылдандыруу, жакырчылыкты азайтуу, маданий жана спорттук иш-чараларды уюштуруу, ишкердикти өнүктүрүү, муниципалдык менчикти натыйжалуу башкаруу, инвестицияларды тартуу жана финансылык каражаттарды сарамжалдуу пайдалануу кирет.

Кыргызстанда мындай конкурстар айыл өкмөттөрүнүн потенциалын ачууга жана айылдарды өнүктүрүүгө чоң демилге болуп эсептелет.