Президент ашыкча текшерүүлөрдү сынга алды
Президент Садыр Жапаров социалдык баракчасы аркылуу Бишкек, Ош мэрлерине сын айтты. Кайрылууда өлкө башчы электр энергиясын электр энергиясын үнөмдөө жана тынчтык мыйзамын камсыздоо тапшырмасын эки мэр “Бөрк ал десе — баш алгандай” ашырып жибергенин айткан.
“Биз спирт ичимдиктерин ичип алып ызы-чуу салгандар чогулган түнкү клубдарды, ошондой эле түн бир оокумга чейин созулуп, 200дөн 800гө чейин киши чогулган тойканаларды иреттеп, мыйзамдын чегинде көзөмөлдөөнү тапшырганбыз. Ал эми силер болсо тамактануучу кафелерди, KFC сыяктуу тез татым жайларын да жаап, тынч отурган элди кубалап чыгарууга чейин барыпсыңар. Рейд маалында бизнес ээлерине орой мамиле жасап, жарыгын өчүрүп, суусун токтотууга тапшырма берипсиңер”,-деген президент баракчасында.
Буга улай С.Жапаров электр энергиясын үнөмдөөнү - биринчи кезекте кайдыгер жетекчилерден, түнү бою жарыгын күйгүзүп таштап кеткен мамлекеттик ишканалардын имараттарынан баштоо керек экенин жазган. Ошондой эле ал тынч иштеп жаткан кичи жайлардын тынчын албоону эскерткен.
Эске салсак, кечээ айрым жетекчилер милиция кызматкерлеринин коштоосунда кафе-ресторан, клубдарды текшеришип, алардын жарыктарын өчүрүп, мекемелерди жабууну талап кылышкан.
