Президент: Энергетика тармагынын 137 млрд сом карызынын 112 млрд сому жабылды
Президент Садыр Жапаров өлкөнүн энергетика тармагы 2020-жылга чейин оор абалда болгонун, карыздын көлөмү өскөнүн жана ошол кездеги башкаруулар маселени терең кризиске алып келгенин айтты. Бул тууралуу ал “Кабар” улуттук маалымат агенттигине берген маегинде билдирди.
Өлкө башчысы билдиргендей, энергетика тармагындагы карыз жүгү жылдар өткөн сайын олуттуу өсүп келген. Эгер 1990–2010-жылдар аралыгында Энергетика министрлигинин жалпы карызы 13,6 млрд сом болсо, 2010–2020-жылдарда бул көрсөткүч кескин жогорулап, ондогон эсе көбөйгөн.
Андан ары президент төмөнкүдөй сандык маалыматтарды мисал келтирди:
“1990-жылдан 2010-жылга чейин 20 жылда 13,6 миллиард сом карыз болсо, 2010дон 2020-жылга чейин 10 эле жылда 123 миллиард сом карыз үстүнө кошулуп жатат. Жалпысынан 2020-жылдын октябрь окуясына чейин министрликтин карызы 137 миллиард сом, же 1,5 миллиард долларга жеткен. Бул сөз сазга тизесине эмес, кекиртегине да эмес, чекесине чейин батырган деген сөз. Энергосистемабыз банкрот болуп калган”.
Ал энергетика тармагы кызматкерлерине банктан үстөгү менен насыя алып айлык төлөп келүү 2010–2020-жылдардагы абалдын мисалы экенин да айтты.
Президент белгилеген маалыматка ылайык, ошол жылдары РСК 201 млн сом насыяны үстөгү менен алып, кызматкерлердин эмгек акысын жапкан учурлар болгон.
“2021-жылдан тартып бүгүнкү күнгө чейин айлык төлөө үчүн банктан 1 тыйын алган жокпуз”, — деди ал.
Садыр Жапаров энергетикадагы абалды жакшыртуу боюнча көрсөткүчтөрдү да атады:
- 137 млрд сом карыздын 112 млрд сому жабылды,
- Калган 25 млрд сом 2026-жыл ичинде толук жабылары күтүлүүдө,
- 2027-жылдан тартып энергосистема биринчи жолу кирешеге чыга баштайт.
Мамлекет башчысы 2020-жылга чейин тармакта коррупция жана ар кандай “схемалар” болгонун, алар азыр толугу менен жоюлганын билдирди:
“Схемалардын баары талкаланды. Ошон үчүн энергокомпаниялар бат темп менен карыздарын жаап жатат”, — деди президент.
