Өлкөдө балдарды эрте өнүктүрүү кызматтары менен камтуу 55 пайыздан ашканы айтылды
Агартуу министри Догдуркүл Кендирбаева Бангкок шаарында балдарды багуу системаларын өнүктүрүү маселелери боюнча эл аралык тажрыйба алмашуунун алкагында өткөн "Азия-Тынч океан чөлкөмүндө балдарды багуу боюнча сапаттуу жана жеткиликтүү кызматтарды өнүктүрүү" аттуу эл аралык сессияда сөз сүйлөдү.
Маалыматка караганда, министр өз сөзүндө катышуучуларды балдарды эрте өнүктүрүү жана мектепке чейинки билим берүү жаатындагы Кыргызстандын тажрыйбасы менен тааныштырды.
Ал билим берүү кызматтарынын жеткиликтүүлүгүн кеңейтүү жана ар бир баланын өнүгүүсү үчүн жагымдуу, инклюзивдүү чөйрө түзүү тууралуу айтып берди.
Анда өлкөдө балдарды эрте өнүктүрүү кызматтары менен камтуу көрсөткүчү 55 пайыздан ашканы белгиленди.
Министр ченемдик стандарттарды өркүндөтүү, педагогикалык кадрларды даярдоо, инклюзивдүү ыкмаларды киргизүү жана мектепке чейинки билим берүү кызматтарын көрсөтүү жол-жоболорун жөнөкөйлөтүү үчүн санариптик чечимдерди колдонуу тажрыйбасы менен бөлүштү.
Ошондой эле балдарды багуу боюнча жеткиликтүү кызматтардын социалдык-экономикалык мааниси белгиленди.
Сессиянын жүрүшүндө Кыргыз Республикасынын, Кук аралдарынын, Филиппиндин жана Вануатунун өкүлдөрү балдарды багуу боюнча сапаттуу жана жеткиликтүү кызматтарды камсыз кылуу, инфраструктураны өнүктүрүү жана адистерди даярдоо боюнча улуттук тажрыйбалары жана ыкмалары менен бөлүштү.
