Жеке мектеп ачуу жана айдоочулук күбөлүк алмаштыруу иштери жеңилдейт
Министрлер Кабинетинин Төрагасы Адылбек Касымалиев "Өкмөттүк акселераторлор" программасынын алкагында жүргүзүлгөн реформалардын жыйынтыктары менен тааныштырды. Бул тууралуу өкмөттүн маалымат кызматынан билдиришти.
Программа быйыл августта башталып, эки негизги багыт боюнча ишке ашты.
Биринчиси – жеке менчик мектептерди лицензиялоо процессин жөнөкөйлөтүү. Бишкек, Ош шаарлары жана аймактардагы калктын тез өсүшү мамлекеттик мектептерди ашыкча жүктөгөнү үчүн жеке сектордун потенциалын колдонууга шарт түзүлдү. Реформага ылайык:
- Лицензиялоо онлайн жүргүзүлөт;
- Имаратты кайра профилдөө талабы алынган;
- Санитардык жана өрт коопсуздугу боюнча корутундулар алуу мөөнөтү 30 күндөн шаарда 3 күнгө, аймакта 7 күнгө кыскартылды;
- Ашыкча текшерүүлөр алынып салынды;
- Арыз берүү жана лицензия берүү процесси толугу менен автоматташтырылды.
Натыйжада лицензиялоо мөөнөтү 3–4 айдан 20 күнгө кыскарды.
Экинчи чакырык улуттук айдоочулук күбөлүктөрдү алмаштыруу процессин жөнөкөйлөтүүгө багытталды. Эми жарандар:
- Онлайн арыз берип, QR-код жана банктык тиркемелер аркылуу кызмат акысын төлөй алат;
- Арыз берүү убактысы 1,5 сааттан 10 мүнөткө кыскарды;
- Даяр документти 1–2 күндө «Кыргыз почтасы» аркылуу үйгө алууга болот.
Адылбек Касымалиев реформалар мамлекеттик органдардын координацияланган ишинин натыйжасында ишке ашканын белгиледи жана катышкан бардык кызматкерлерге ыраазычылык билдирди.
