Президент сот системасын санариптештирүү боюнча жаңы мыйзамга кол койду
Президент Садыр Жапаров “Кыргыз Республикасынын айрым мыйзам актыларына өзгөртүүлөрдү киргизүү жөнүндө” Мыйзамга кол койду. Мыйзам 25-сентябрда Жогорку Кеңеш тарабынан кабыл алынган жана сот системасын санариптик технологиялар менен өркүндөтүүгө, ошондой эле жарандардын сот адилеттигине жеткиликтүүлүгүн жакшыртууга багытталган.
Аталган Мыйзам сот өндүрүшүнүн санариптик формасын киргизет. Мунун негизинде ишти кароо жана чечимдерди кабыл алуу процессин тездетүү үчүн зарыл болгон укуктук шарттар түзүлөт. Доогер, жоопкер, күбө, эксперт жана башка катышуучулар үчүн сот имараттарына баруу азайып, процесске катышуу жеңилдей турган болду.
Ошондой эле мыйзам процессуалдык эрежелерди санариптик технологиялар менен жүргүзүүнү камсыздайт, соттук документтерди кагаз түрүндө жасоо милдетин альтернатива менен алмаштырат. Бул жарандар үчүн ыңгайлуулукту көбөйтүп, сот системасынын өздүк технологиялык мүмкүнчүлүктөрүн натыйжалуу пайдаланууга шарт түзөт.
Мыйзам 2026-жылдын 1 январынан тартып күчүнө кирет жана ал жарандарга сот өндүрүшүнө тез жана жеткиликтүү катышууга жаңы мүмкүнчүлүк берет.
