Президент “Саламат жүрөк” улуттук программасына кол койду
Президент Садыр Жапаров 2025–2030-жылдарга Кыргыз Республикасынын “Саламат жүрөк” улуттук программасына кол койду. Программа калктын жүрөк-кан тамыр ооруларынан жана башка жугуштуу эмес оорулардан мезгилсиз өлүмдү 25%га азайтууга жана саламаттык сактоодогу теңсиздикти жоюуга багытталат.
Программа алдын алуу, эрте диагностикалоо, дарылоо жана реабилитациялоо боюнча толук циклдүү, санариптик жана бейтапка багытталган системаны түзүүнү көздөйт. Ал үй-бүлөлүк ден-соолук контролунан баштап, жогорку технологиялык жардам көрсөтүлгөн борборлорго чейинки медициналык кызматтарды камтыйт.
Жарлыкка ылайык, бардык мамлекеттик органдар белгиленген иш-чараларды өз убагында аткарып, жарым жылдык отчетторду Саламаттык сактоо министрлигине берүүгө милдеттендирилди.
Мамлекет калктын саламаттыгына өзгөчө көңүл буруп, бул программаны өлкөнүн туруктуу социалдык-экономикалык өнүгүүсүнүн маанилүү куралы катары карайт.
