ИИМ акысыз интернет сунуштаган алдамчылардан сак болууну эскертти
Ички иштер министрлиги жарандарды акысыз спутниктик интернетке туташтыруу шылтоосу менен жасалышы мүмкүн болгон алдамчылык аракеттерден сак болууга чакырды. Бул тууралуу министрликтин басма сөз кызматы кабарлады.
Маалыматка ылайык, алдамчылар WhatsApp аркылуу спутниктик интернет сыноо иретинде ишке киргизилгени тууралуу жалган билдирүүлөрдү таратып, акысыз туташууну жана интернеттин ылдамдыгын жогорулатууну сунушташууда.
Андан соң интернетти жөндөө шылтоосу менен зыяндуу программалар камтылган APK-файлдарды жөнөтүшөт. Мындай файлдарды орнотуу жеке маалыматтардын уурдалышына, банктык тиркемелерге жана аккаунттарга уруксатсыз кирүүгө алып келиши мүмкүн.
ИИМ жарандарды белгисиз адамдар жөнөткөн файлдарды орнотпоого, шектүү шилтемелерге кирбөөгө жана жаңы кызматтар тууралуу маалыматты расмий булактардан гана тактоого чакырды.
