Кыргызстан БАЭК аркылуу аймактык байланышты чыңдоого умтулат
Министрлер Кабинетинин Төрагасы Адылбек Касымалиев Борбордук Азия аймактык экономикалык кызматташтыгынын (БАЭК) 24-министрлик конференциясына катышты. Бул тууралуу өкмөттүн маалымат кызматынан билдиришти.
Жолугушууда Адылбек Касымалиев БАЭК аймактык байланыштарды чыңдоонун, сооданы жана инвестицияларды стимулдаштыруунун, өсүштү тездетүүнүн жана аймактагы туруктуулукту бекемдөөнүн натыйжалуу куралы экенин белгиледи. Ал аймактык соода-экономикалык кызматташтыкты кеңейтүүгө, товар жүгүртүүнү көбөйтүүгө, транспорттук коридорлорду модернизациялоого жана жаңы темир жолдорду курууга Кыргызстандын кызыкдар экенин айтты.
Мындан тышкары, БАЭК өлкөлөрүнүн бизнеси жана мамлекеттик органдарынын "бирдиктүү терезе" улуттук маалыматтык системаларын киргизүү аркылуу тышкы соодадагы документтерди жана уруксаттарды жөнөкөйлөтүү, чек ара пункттарынын натыйжалуулугун жогорулатуу маанилүү экенин кошумчалады. Адамдык капиталды өнүктүрүү үчүн эмгек рыногунун улуттук маалыматтык системаларын интеграциялоо да артыкчылык катары белгиленди.
Иш-чаранын алкагында бир катар документтерге кол коюлду жана Кыргызстан БАЭКтин өз ара пайдалуу демилгелерин ишке ашырууга активдүү катышууга даяр экенин ырастады.
