Кыргызстан менен Кытай стратегиялык өнөктөштүктү кеңейтет
Президент Садыр Жапаров бүгүн, 19-ноябрда, Кытай Коммунисттик партиясынын Борбордук комитетинин Саясий бюросунун мүчөсү жана Кытай Эл Республикасынын Тышкы иштер министри Ван Ини кабыл алды.
Жолугушуда эки тарап саясий диалогду бекемдөө, биргелешкен долбоорлорду ишке ашыруу жана ар тараптуу стратегиялык кызматташтыкты тереңдетүү маселелерин талкуулашты. Мамлекет башчысы кыргыз-кытай мамилелери бүгүн тарыхый жогорку деңгээлге жеткенин белгилеп, Ван Инин ар бир сапары кошумча мазмун жана жаңы дем берүүдө экенин айтты.
Президент өзгөчө практикалык кызматташтыкка токтолуп, темир жана авто жолдорду куруу, жаңы авиакаттамдарды ачуу жана бир катар тармактарда биргелешкен долбоорлорду ишке ашыруунун маанисин баса белгиледи. Ошондой эле ШКУ жана "Борбор Азия – Кытай" форматындагы көп тараптуу алакалардын динамикалуу өнүгүп жатканын айтты.
Ван И өз кезегинде КЭР Төрагасы Си Цзиньпиндин жылуу саламын жеткирди жана Кыргызстан соңку жылдары олуттуу жетишкендиктерге жеткенин белгиледи. Ал Кытай кошуна жана ишенимдүү өнөктөш катары муну кубаттай турганын айтып, эки мамлекет башчыларынын макулдашууларын ишке ашырууга толук даяр экенин билдирди.
Жолугушуунун соңунда Президент Садыр Жапаров Си Цзиньпинге саламын жолдоп, Ван Иге ишинде ийгиликтерди каалады.
