Президенттик администрация менен ЮНИСЕФ "Балдар айтат – 2025" жолугушууларын өткөрдү
Кыргыз Республикасынын Президентинин Администрациясынын Балдардын укуктары боюнча ыйгарым укуктуу өкүлүнүн катчылыгы ЮНИСЕФтин Балдар фонду менен биргеликте "Балдар айтат – 2025" жолугушууларынын сериясын өткөрдү. Бул тууралуу Президенттин Администрациясынан билдиришти.
Иш-чарага бир катар мамлекеттик органдар, Бишкек шаарынын мэриясы, эл аралык уюмдар жана дипломатиялык өкүлчүлүктөр катышты. Демилгенин негизги максаты – балдар өз оюн эркин айта турган жана мамлекеттик органдар аны чечим кабыл алууда эске алган аянтча түзүү.
Жолугушууларда балдар үчүн маанилүү болгон бир нече багыттар талкууланды. Алардын ичинде мектептердин инфраструктурасын жакшыртуу, буллингге каршы чаралар, санариптик коопсуздук, мүмкүнчүлүгү чектелген балдар үчүн кызматтардын жеткиликтүүлүгү, үй-бүлөдөгү коопсуздук, балдардын мамлекеттик чечимдерге катышуусун кеңейтүү.
Балдардын айткандары чыныгы турмуштук тажрыйбаларды чагылдырып, мамлекеттик органдар үчүн маанилүү багыттарды белгилөөгө жардам берди.
"Биз балдар көйгөйлөрдү талдап, чечимдерди сунуштоого даяр экенин көрүп жатабыз. Биздин милдет – алардын үнү мамлекеттик саясат үчүн реалдуу багыт болушун камсыз кылуу», – деди Балдар укуктары боюнча ыйгарым укуктуу өкүл Асель Чынбаева.
Министрликтер, мэрия жана эл аралык өнөктөштөр балдардын сунуштарын карап чыгууга жана аларды өз пландарына киргизүүгө даяр экенин билдиришти.
"Балдар айтат – 2025" демилгеси балдардын коомдук турмушка катышуусун күчөтүп, алардын пикирин урматтоо маданиятын бекемдөөгө багытталган. Иш-чаралар 2026-жылы да улантылары кабарланды.
