Бишкекте 34 миң батирлүү “Алтай” шаарчасынын курулушу расмий башталды
Президент Садыр Жапаров кечээ, 20-ноябрда, Бишкек шаарындагы ири социалдык-тиричилик долбоорлорунун бири болгон “Алтай” шаарчасынын курулушуна мезгил кутусун салуу аземине катышты.
“Алтай” — 234 гектар аянтта жайгашкан, 1551 беш кабаттуу үйдү жана 34 004 батирди камтыган кеңири масштабдуу турак жай комплекси. Курулуштун жалпы аянты 1 миллион 7 миң чарчы метрден ашат. Долбоор шаар тургундарынын толук кандуу жашоосуна ылайыкташтырылган социалдык инфраструктураны өзүнө камтыйт. Анда мектептер, бала бакчалар, поликлиникалар, ооруканалар, реабилитациялык борборлор, милиция жана өрт-куткаруу бөлүмдөрү курулат.
Комплексте 50 гектарлык чоң сейил бак, заманбап спорт жана балдар аянтчалары да каралган. Транспорт тармагында 86 чакырым жол, 50 чакырым тротуар, ошондой эле 34 500 орундуу автоунаа токтотуучу жайларкурулушу пландалган.
Өз сөзүндө Президент Садыр Жапаров “Алтай” долбоору калктын турак жайга болгон муктаждыгын чечүүгө жана шаар инфратүзүмүн жаңы деңгээлге чыгарууга багытталганын баса белгиледи. Мамлекеттик келишимге ылайык, батирлердин 10%ы — 3 400 даанасы мамлекеттин менчигине өткөрүлөт.
Мамлекет башчысы бул долбоор чөлкөмдөгү эң ири курулуш иши экенин белгилеп, ал аяктаганда өзүнчө жаңы маданияттагы заманбап шаарчага айланаарына ишеним билдирди.
Иш-чаранын соңунда Президент шаар тургундары менен баарлашып, алардын билим берүү, коммуналдык кызматтар, жол жана социалдык шарттарды жакшыртуу тууралуу көтөргөн маселелерин угуп, тиешелүү мамлекеттик органдарга аларды кароо жана чара көрүү боюнча тапшырма берди.
