Д.Орунбеков: "Россия банктарына акча которуу – кадимки эле акча, товар жүгүртүү"
Президенттин администрациясынын маалыматтык саясат кызматынын жетекчиси Дайырбек Орунбеков социалдык тармактагы баракчасы аркылуу Британ агенттиги "Керемет банкты" сатып алганы боюнча пикирин билдирди.
Анын айтымында, Батыш – Кыргызстандын эки банкына “силер Россиянын Сбербанкы менен кызматташып, алардын акчаларын "адалдап" берип жатасыңар" деген жалаа менен санкция киргизген.
“Бүгүнкү күндө Россияда 1 миллионго жакын мигранттар, мекендештерибиз иштеп жүрөт. Алар күн сайын Кыргызстандагы туугандарына миллиарддаган рубль акча каражаттарын ошол эле Сбербанк жана башка банктар аркылуу жөнөтүшөт. Ал акчалар Кыргызстанда конвертацияланып, мигранттардын туугандарына сом менен берилет. Рублдар болсо кайра эле Россияга товар сатып алуу үчүн жөнөтүлөт”,-дейт ал.
Тагыраагы, Кыргызстан ошол акчаларга кайра эле Россиядан нефть, газ, металл, буудай, азык-түлүк түрлөрүн, курулуш материалдарын сатып алгандыктан ал жактан келген акча каражаттары экономикалык айланма аркылуу кайра Россияга кетет.
“Бул кадимки эле товар, акча жүгүртүү. Бул агымдар Кыргызстандын экономикасы үчүн нормалдуу жана зарыл процесс.
Ошондуктан, банктарды "Силер Россиянын банктары менен кызматташып жатасыңар" деп айыптоо Кыргызстандын өнүгүп келе жаткан экономикасына бут тосуу, жамандык жасоо аракети деп айтса болот.
Россиянын банктары менен кызматташпай коюу биздин өлкөнүн каржылык туруктуулугуна жана мигранттардын үй-бүлөлөрүнө түздөн-түз зыян келтириши мүмкүн", - деген ал.
