Кыргызстан Доха саммитинин жыйынтыктарын ишке киргизүүгө киришти
Министрлер Кабинети Дохада өткөн Социалдык өнүктүрүү боюнча экинчи дүйнөлүк саммиттин жыйынтыктарын талкуулоо максатында эл аралык уюмдар, дипломатиялык өкүлчүлүктөр, БУУ агенттиктери, жарандык коом жана жеке сектор менен биргеликте кеңешме өткөрдү.
Жыйында агартуу, саламаттыкты сактоо, социалдык камсыздоо, эмгек, каржы жана экономика министрликтеринин жетекчилери улуттук артыкчылыктарды сунуштап, адамдык капиталды өнүктүрүү жана социалдык саясатты жакшыртуу боюнча мындан аркы аракеттерди талкуулашты. Катышуучулар Дохада кабыл алынган максаттарды аткаруу үчүн ведомстволор аралык тыгыз координация зарылдыгын белгилешти.
МинКаб төрагасынын орун басары Эдил Байсалов сөзүндө:
"Доха саясий декларациясы биздин багытыбызга толук шайкеш келет. Биз социалдык коргоону, билим берүүнү, саламаттыкты сактоону жана татыктуу эмгекти күчөтүү үчүн улуттук жана эл аралык ресурстарды мобилизациялайбыз. Элдин жашоо деңгээлин жогорулатуу — биздин негизги максатыбыз", — деди.
Маалымат үчүн, 2025-жылдын 4-6-ноябрь күндөрү өткөн дүйнөлүк саммит адамдык ар-намысты, социалдык инклюзияны жана туруктуу өнүгүүгө багытталган глобалдык милдеттенмени кайра тастыктаган. Доха саясий декларациясы 2030-жылга чейинки Улуттук өнүктүрүү программасын жана БУУ менен кызматташуу алкагын ишке ашырууда маанилүү платформа болуп саналат.
