МинКаб башчысы "Торугарт-1дин" көмүрүн экспортко чыгарууну тапшырды
Министрлер Кабинетинин Төрагасы Адылбек Касымалиев Нарын облусуна болгон иш сапарынын алкагында “Торугарт” көзөмөл өткөрүү пунктунун жана “Торугарт-1” көмүр тилкесинин иши менен таанышты. Бул тууралуу өкмөттүн басма өз кызматынан билдиришти.
Иш сапар алгач “Торугарт” көзөмөл өткөрүү пунктундагы жаңы оңдоп-түзөөдөн өтүп, пайдаланууга берилген жөө жүргүнчүлөрдү тейлөө пунктун көрүүдөн башталды. Андан соң Касымалиев “Чатыр-Көл” чек ара бөлүмчөсүнө барып, аскер кызматкерлеринин жашоо-шартын жана кызмат өтөө жагдайын текшерди.
Сапардын жүрүшүндө МинКаб башчысы ушул жылдын 12-ноябрында ачылып иштеп жаткан “Торугарт-1” көмүр кенине да барды. Маалыматка ылайык, “Кыргызкөмүр” ААКсы аталган тилкени чалгындоо үчүн 557,6 гектар жерге лицензияга ээ болгон. Учурда анын 25 гектарында көмүр кени бар экени аныкталып, болжолдуу запасы 423,4 миң тонна деп бааланууда.
Бүгүнкү күндө аталган тилкеден 10 миң тоннага жакын көмүр өндүрүлгөн.
Адылбек Касымалиев көмүр тилкесиндеги иштерди тездетүүнү жана “Торугарт-1” көмүрүн кыска убакытта экспортко чыгаруу боюнча тапшырма берди.
