Кыргызстанда аскердик билет жана эмгек китепче санарип форматта жеткиликтүү болду
Президенттин администрациясынын аппараттык жыйынында аскердик билеттерди жана эмгек китепчелерди санариптештирүүнүн алгачкы жыйынтыктары талкууланды. Бул тууралуу өкмөттүн басма сөз кызматынан билдиришти.
Министрлер Кабинетинин Төрагасы Адылбек Касымалиевдин айтымында, аскердик билеттерди санарип форматка өткөрүү ишинин башталышы менен Кыргызстандын жарандары аларды “Түндүк” мобилдик колдонмосу аркылуу электрондук түрдө пайдалана алышат. Ал бул чара мобилизациялык ресурстарды так жана сапаттуу эсепке алууну, ошондой эле көзөмөлдү күчөтүүнү камсыздай турганын белгиледи.
Мындан сырткары, Касымалиев “Е-Кызмат” системасынын негизинде түзүлгөн электрондук эмгек китепчесин да “Түндүк” мобилдик колдонмосунан көрүүгө мүмкүн экенин кошумчалады.
“Эмгек китепчени санариптештирүү бул жөн гана ыңгайлуулук эмес, маалыматтардын аныктыгынын жана корголушунун кепилдиги экенин белгилейм. Башкача айтканда, система жумушчулар үчүн гана эмес, жумуш берүүчүлөр үчүн да коопсуздукту камсыздайт. Эмгек китепчелерин санариптештирүү жөн гана технологиялык жаңылоо эмес. Жалпысынан, эмгек китепчелерин санариптештирүү менен ар бир жараныбыздын эмгек тарыхынын аныктыгын, маалыматтарынын коопсуздугун жана жеткиликтүүлүгүн түзүүгө карай маанилүү кадам жасадык”, – деди ал.
