РФ президенти Владимир Путин менен ири делегация келди
25-27-ноябрда Бишкек шаарында Россия Федерациясынын президенти Владимир Путиндин мамлекеттик иш сапары болуп жатат. Иш-чаранын кеңири программасынан сырткары Россия лидери менен келген делегациянын масштабы чоң экени белгилүү болду.
Россия тараптан келген делегациянын курамында өкмөттүн, мамлекеттик ведомстволордун, мамлекеттик корпорациялардын жана бизнес өкүлдөрү бар. Бизнес секторунан Роман Абрамович, Петр Фрадков (Өнөр жай байланыш банкы), Михаил Волков (Россия почтасы) катышууда.
Жогорку мамлекеттик кызматтагы катышуучулардын арасында Россия Федерациясынын Өкмөтүнүн төрагасынын орун басары Алексей Оверчук жана жети федералдык министр бар. Алар: Владимир Колокольцев (ИИМ), Михаил Дегтярев (Спорт министри), Михаил Мурашко (Саламаттык сактоо министри), Андрей Никитин (Өнөр жай жана соода министри), Максим Решетников (Экономикалык өнүгүү министри), Валерий Фальков (Илим жана жогорку билим министри), Сергей Цивилев (Энергетика министри).
Ошондой эле делегация курамында ведомстволордун жана уюмдардын жетекчилери бар. Россиянын Керектөөчүлөрдүн укугун жана адам бакубаттуулугун коргоону көзөмөлдөө боюнча федералдык кызматынын жетекчиси Анна Попова, Россия Борбордук банкынын жетекчиси Эльвира Набиуллина, Агартуу министринин орун басары жана статс-катчы Андрей Корнеев жана Аскердик-техникалык кызматташтык боюнча федералдык кызматынан, Алексей Лихачев башында турган Росатом өкүлдөрү, өнөр жай жана энергетикалык блоктордун өкүлдөрү да бар.
Ал эми Россия президентинин администрациясынан Юрий Ушаков, Дмитрий Песков жана Максим Орешкин катышууда.
Иш сапардын алкагында тараптар эки өлкөнүн мамилелерин чыңдоого багытталган бир катар жолугушууларды өткөрүүнү пландаштырууда.
