Садыр Жапаров менен Владимир Путин бир катар эки тараптуу документтерге кол коюшту
Россия Федерациясынын Президенти Владимир Путиндин Кыргыз Республикасына болгон мамлекеттик сапарынын алкагында билим берүү, саламаттык сактоо, миграция, коопсуздук, экономикалык жана аскердик-техникалык кызматташтык багыттарында бир катар эки тараптуу документтерге кол коюлду.
Кыргызстандын Президенти Садыр Жапаров менен Россиянын Президенти Владимир Путин союздаштык жана стратегиялык өнөктөштүк мамилелерин тереңдетүү тууралуу Биргелешкен билдирүүгө кол коюшту.
Кол коюлган негизги документтердин арасында:
- Экономикалык кызматташтык: Кыргыз Республикасынын Экономика жана коммерция министрлиги менен Россия Федерациясынын Экономикалык өнүгүү министрлигинин стратегиялык пландоо жаатындагы меморандуму;
- Ички иштер жана миграция: Министрлер Кабинети менен Россия Федерациясынын компетенттүү органдарынын өкүлчүлүктөрүнүн укуктук статусу боюнча макулдашуу;
- Билим берүү: Кыргыз-Россия Славян университетинин кампусун куруу боюнча макулдашуу;
- Саламаттык сактоо: Калктын санитардык-эпидемиологиялык бейпилдигин камсыз кылуу жана кардиология жаатындагы өз ара түшүнүшүү меморандумдары;
- Аскердик-техникалык кызматташтык: 2017-жылдагы келишимге өзгөртүүлөрдү киргизүү боюнча протокол;
- Почта кызматтары: “Кыргыз почтасы” менен “Россия почтасы” ортосундагы макулдашуу.
Бул документтер эки өлкөнүн ортосундагы кызматташтыкты чыңдоо жана стратегиялык өнөктөштүктү бекемдөө багытындагы маанилүү кадам болуп саналат.
