Депутат Ат-Башыда 700 млн сомдук таза суу долбоору менен таанышты
Нарын облусунун Ат-Башы районунда таза суу долбоорунун алкагында жүргүзүлүп жаткан курулуш иштеринин жай жүрүшүнө жана сапатына жергиликтүү тургундар нааразычылык билдиришти. Бул тууралуу Жогорку Кеңештин депутаты Кубанычбек Самаков өзүнүн социалдык тармактагы баракчасында билдирди.
27-октябрда Ат-Башы айылында өткөн жолугушууда тургундар казылган көчөлөрдүн калыбына келтирилбей жатканын, курулуш иштеринин жай жүрүшүн жана кудуктардын абалын көтөрүштү.
Маалыматка ылайык, Ат-Башы жана Ак-Жар айылдарын таза суу менен камсыз кылуу долбоорунун жалпы наркы 700 млн сомдон ашат. Ал Азия өнүктүрүү банкынын кредиттик жана гранттык каражаттарынын, ошондой эле республикалык бюджеттин эсебинен каржыланууда. Долбоордун алкагында 86,9 чакырым суу түтүгүн тартуу пландалган.
Жолугушуунун жыйынтыгында подряддык уюмдарга курулуш иштерин тездетүү, казылган көчөлөрдү калыбына келтирүү, грейдер менен тегиздөө жана техниканын санын көбөйтүү талаптары коюлганын билдирди Самаков.
Ошондой эле жергиликтүү бийлик органдарына иштердин сапатына жана белгиленген мөөнөттөрдүн сакталышына көзөмөлдү күчөтүү тапшырылганын кошумчалады.
