Кыргызстандын тигүү тармагындагы Россияга байланыштуу маселеси жакында чечилет
Кечээ Владимир Путиндин Кыргызстанга болгон мамлекеттик сапарынын алкагында тигүү өнөр жайындагы маселелер да талкууланганын жана тигүү тармагындагы көйгөйлөр жакынкы арада чечилет министрлер кабинетинин төрагасынын биринчи орун басары Данияр Амангелдиев “Ынтымак Ордодо” журналисттердин суроолоруна жооп берип жатып билдирди.
"Бизге түздөн-түз тапшырма берилген. Бүгүнкү күндө бул маселе чечилет. Биздин ички өндүрүүчүлөрдүн, тигүү цехтеринин маселеси да талкууланып, тиешелүү тапшырмалар берилди. Биз булардын үстүнөн иштейбиз", - деди ал.
Эске салсак, буга чейин Россия ири партиялар менен кийим жөнөткөн тигүүчүлөр эки-үч айдан бери товарлары Россия-Казакстан чек арасынан өтпөй турганын айтып бийликке кайрылышкан. Акыркы эки айда Кыргызстандагы кийим тигүүчү цехтердин көбү убактылуу жабылууга аргасыз болгону баарыбызга маалым.
Улуттук статистика комитетинин маалыматына таянсак, Кыргызстандын текстиль жана тигүү тармагында 200гө жакын ишкана жана дээрлик 3 миң жеке ишкер бар. Аларда 128 миңден ашык адам эмгектенет. Бирок расмий эмес маалымат боюнча бул тармактагы жеке ишкерлердин саны 10 миңден ашары, ал эми тигүү тармагында түз жана кыйыр иштегендердин саны 250 миңден ашары тууралуу маалымат бар.
