Кыргызстан менен Германия кызматташтыкты жаңы деңгээлге чыгарууну талкуулады
Министрлер Кабинетинин Төрагасы Адылбек Касымалиев Берлин шаарына (Германия Федеративдик Республикасы) жумуш сапары менен барган. Өкмөт башчы Германиянын Бундестагындагы "Германия – Борбордук Азия достук тобу" депутаттары менен жумушчу эртең мененки тамак форматында жолугушуу өткөрдү. Бул тууралуу Өкмөттүн басма сөз кызматынан билдиришти.
Жолугушуунун жүрүшүндө тараптар кыргыз-герман кызматташтыгын мындан ары чыңдоого багытталган кеңири чөйрөдөгү маселелерди талкуулашты.
Касымалиев сүйлөшүүлөрдө Германияны Европа Биримдигинде жана жалпы Европа мейкиндиктеринде Кыргызстандын негизги өнөктөшү катары белгилеп, эки өлкөнүн ортосунда саясий диалогду бекемдөө, узак мөөнөттүү экономикалык долбоорлор, инфраструктура, агроөнөр жай, экспортту диверсификациялоо жана инвестициялык тармактардагы кызматташтыкты өнүктүрүү тууралуу пикирин билдирди.
Ал ошондой эле административдик регламенттерди жөнөкөйлөтүү, салык саясатын модернизациялоо жана санариптик сервистерди киргизүү аркылуу инвесторлор үчүн жагымдуу шарттарды түзүүгө умтулуп жатканын баса белгиледи.
Жолугушуунун жүрүшүндө парламенттер аралык байланыштарды өнүктүрүү, тажрыйба алмашуу, реформаларды талкуулоо жана эки тараптуу кызматташтыктын бардык багыттары боюнча биргелешкен аракеттерди күчөтүү зарылдыгы белгиленди.
